بداية قصتي وياك
كانت سوالف ضحك هذا الي كنت انت تعتبره
وكان احلى اوقاتي معاك لا تكلمت وياك
كنت احس انك لي واني ملكتك
هذا كله قبل ما اتكلم واقول لك احبك
احلى احساس حسيته وياك
على كثر ماشفت ناس تحب
الا اني ماكنت احس ان الحب شي يلفت انتباهي
كان الكل عندي شي عادي
لحد مادخلت انت حياتي
اول مره احس اني ابي انسان
ابيك انت لاول مره احس
اني احب شخص ولو ملكته بضحي بكل شي لجله
شفت فيك شي ماشفته بغيرك
لاتضايقت حصلت نفسي ادورك
ولا حسيت الدنيا ضاقت بلي فيها
رجعت لك
كل هذا وانت ماتدري
مرات اشوفك
ومرات مااحصلك
واكتفي اني اشوف اسمك
كانت ترجع ضحكتي
وكأنك كنت معي
رغم بعدك الا كنت احس بكلامك وضحكك وكنت افرح بهالاحساس
ولما قربت منك وقلت لك احبك
انت حبيتني اكثر من الحب الي كنت متوقعته
حنون وياي وطيب تحملت اشياء لجل حبنا
ورغم الي يحصل
كنت ماتمل وتبقى وياي
ممكن لو غيرك بعد وماستمر وياي
لكن انت بقيت تخاف علي وتغار وتحبني
وكل مره كان يزيد هذا الشي
صرت اشوف كل الدنيا فيك
واشوفك انت كل الدنيا
قبل مااعرفك كانت ضيقتي وفرحتي
حتى الشي الي يضحكني اتركه بيني وبين نفسي
ماتعودت اشارك حياتي ويا احد
ولما حصلتك صرت اشارك كل حياتي وياك
ماخليتني احتاج غيرك
بكل وقتي وبكل دقيقه تمر علي
كنت ابيك
مـا كنت احتاج احد كثر مااحتاجك بقربي
بقربك انت كنت تعطيني دافع اعيش فيه بحياتي بقربك مني كنت احس بأمان لدرجه اني مااخاف من شي واحس اني بملك الكون طول ماانت وياي
تشجعني على الشي وتهمل روحك لجلي انا
وتشوف سعادتك بسعادتي
تتركني اطلع شقاوتي وقهري وكل الي فيني فيك
وتبقى لاخر لحظه تقول لي احبك
لا كنت بمكان وانت مو وياي
كل مافيني يتغير
انشغل بالساعه التفت حولي
وكأني ادور عليك
ماابي بحياتي غيرك
كل مافيني يبيك انت
انت الوحيد الي قبل اتكلم تفهمني
واذا على حياتي من بعدك
وربي اتمنى اموت ولا اشوفك بعيد عني
او اشوفك مع غيري
حياتي كلها وقفت عليك انت
حصلت فيك الحب
الي بحياتي ماراح احصله ويا احد غيرك
وربي اصعب شي ممكن اسويه بحياتي
اني اعيش من غيرك انت
اتمنى اخذك من الدنيا ذي كلها
وابقى معك طول العمر
ماابي غيري يشوفك او يكلمك او حتى يقرب منك
ابيك تبقى لي
لي انا بروحي
ولا ابي احد يشاركني فيك
ليه دايم اشتاق لك
ومااقدر اكون وياك
انا طول ماانت بعيد مااقدر اعيش
ابيك تكون اقرب من كل هالدنيا لي
آحبــك ....
^_^"
ليست هناك تعليقات:
إرسال تعليق